1. Нешличила пикруми

***

Кьаркьала зимбирг1яхъу,

Ах1ерсила вайбаркьли

Лебил гьунар кебису.

Игусила дигайли

Вахъ уктемли вашахъу,

Шаддешла х1улк1ул гьавли

Улхъули ганзик1ахъу.
***

Ц1али бигуб сагара

Х1ебли шинишбирахъу,

Бигуб урк1ила дардра…

Манзилли сагъбирахъу.
***

Дигай гьарх1ейзурсини

Г1ямру дех кьяйда диху.

Умут пашбехъубсини

Дунъя шявли чебиу.
***

Вег1личи чебуркъайчи,

Урх1ла дец1 х1ергъу, бик1ар.

Кьадармабиаб, адам,

Х1ед илкьяйда дард аргъес.
***

Камти х1едургар анц1кьи

Дурх1ни ах1ек1убтала.

Амма бахъ рурц1ар урк1и

Лебли, беткахъибтала.

***

Г1янруч1личи шадирар.

Вахъх1и усес дигуси

Савлилис хъутурик1ар.

Г1ях1 девли хъу духъахъу,

Унхъри вавнадирхъяхъу,

Дек1 гъайли хъябхъяливан

Дерхъибтира дулъахъу.
***

Х1янчили някъ белкъунси

Къаркъубачивра усар.

Анц1кьили кьац1уцибси

Ухьалавра усх1евсар.
***

Пух1лали пух1бик1алра,

Бириз бек1 ахъли башар.

Ц1едешли «Ма!» бик1алра,

Чадур бек1 къух1ли бухъар.
***

Ях1личил узусини

Сунела у ахъбурцу.

Х1ярамдеш дигусини

У ах1и, дях1ра дирцу.
***

Гъагулта аяз закла

Куц-кабиз хумардиру.

Изай къугъал чархлара

Сипат пулук1бирахъу.
***

Ванадешли сар, - бик1ар, -

Дях1и-миъ диц1ахъуси.

Ванати гъайли саби

Чархра батбулхъахъуси.
***

Гъамтачи дигичевси -

Илдас г1ях1 барес узар,

Сунес сай дигахъуси –

Илди белт1ес гьуц1ик1ар.
***

Агри-гашили бирар

Арадеш арбихуси,

Палакатдешли бирар

Х1урмат к1унбиц1ахъуси.
***

Урх1ла гьалмагъла диги –

Хъяб-алав гьая сари.

Урк1илис кьабулсила –

Г1янд ирзул пагьму сари.
***

Ях1ла вег1ли гьар сек1ал

Суненил пикридиру.

Лерилра г1ердуралра

Ях1агарли хъумурту.

***

Шах-сирис ц1акьдик1ути,

Г1ямру гьарх1едилзалли -

Анц1кира мурхьдк1ути…

Мискин адам бишт1аси

Савгъатлира шадиру.

Халал напакьалира

Давлачев х1елукъахъу.
***

Къукъу-рямкь чераркьякьи,

Аргъ биршух1ели аргъван,

Аязкадирар дагьри

Инса, г1ямру аркьуцад.
***

Дегъх1ели гегуглаван

Мух1ли бахъ беръаллира,

Жаллукь жаллукьли кавлан,

Сай хъяблаирхъяллира.
***
Гьарилра майдайчир

Гулвавни х1ейрар,

Вавнар сагназирра

Занзби камх1ейрар.

Амъур х1ялал дигайла

Урк1и бирар бахъ г1ях1си,

Лезми бирар малх1ямси,

Гьав бирар аваданси.
***

Манзилла бухъяндешли

Вишт1аси жагьирахъу,

Шахли бяхъиб ванзара

Х1ебли вавнабирхъяхъу.
***

Цалис ца дигутала

Кьасани цадех1 дирар.

Карц1ли х1ербирутала

Къайгъни цагъунти дирар.
***

Хъали-ц1а дигусила

Хъали анк1или бирц1ур.

Х1язани дигусила

Анкъи анц1кьили бирц1ур.
***

Багьана агарли,

Гьанк1ра х1ебумц1ар,

Ца сабаб агарли,

Шинра х1едумкьар.
***

Г1илму х1еделч1ун маза:

«Дахъал далулра», - бик1ар.

Делч1унси: «Далутачир

Х1елути дахъал», - бик1ар.
***

Тухум-агьлу агарти

Илди баргес къяйц1бик1ар.

Тухумти «бахъбаибти»

Илдачибад дуг1 бубшар.
***

Чеббиц1ес вируси

Ах1енну ц1акьси,

Кьиддадеш ибгуси

Сай вахъ пасих1си.
***

Уркъбирхъули, ургъули,

Г1ях1си ветаэс х1ейрар.

Г1ях1сила у дигуси

Вайбаркь барес хьулх1ейк1ар.
***

Мез далутани дунъя

Дигуг1еб бирцра бирцу,

Ялавкар илбисуна

Дигуг1еб исра ису.
***

Духусини жалтазиб

Г1якьлу бугабик1ахъу.

Мех1урли лерил жалти

Къалмакъарличил ирзу.
***

«Вавни дахъх1и х1ерх1ейрар», -

Х1улк1ули дирар занзби,

Вавналацада кьадри

Чула агни балукъи.

***

Дегъдешли жявли бургу.

Гьуйчиб цунси галгара

Дуг1бани жявли бирхъу.

Ятимбиуб жайранра

Буц1ани жявли бурцу.

Ц1уръавиуб адамра

Шишимта жявли ургу.
***

Ялкъузмайаби, адам,

Х1у х1ела г1ямрулизив –

Х1у вигута, х1ед марта

Г1евуцаби гьар х1яйзив!
***

Баришли х1ериэс хьулик1усини

Сунела тайпала х1урмат ахъбурцу,

Пасих1ти дугьбачил урх1ла тайпара

Гьими-кьяс агарли баришбирахъу.

***

Кьут1кьуси биалра сунела кьисмат.

Гьар барх1и дурубван къизбулхъаллира,

Разидеш агарли бурк1уси сяг1ят.

Манзил баибх1ели, х1урхъала г1ела

Г1елаг1ебикили Берх1и ках1евлан.

Кьисматли кьадарлис белк1унсиличил

Баришх1ейэс-дек1ар инсан вирх1ейрар.
***

Янила манзилра маркали урзни,

Гьеч, ах1ен тамаша – ил х1екьдеш саби.

Дахъ абдал уюнта духути биркьни –

Караматдеш саби, гьеч, ах1ергъеси.
***

Ц1уэрли х1яршдирул алхъачуп1 вавни

Дуц1арти дуц1румла ц1али дигалра,

Гье кавлан: сагадан райх1ян х1ерличил

Сага пишбяхъяхъес атх1еблизибра.
***

Х1яжличи башули, х1яя ицути,

Х1яжурта биркьули, х1янкабиубти,

Х1ялалли х1ябрази букьес дигути

Х1якимта даим халкь лут1а х1ябкали.
***

Улгх1елгес вирару хъябшси тухтурлис,

Бебк1ала кьялшуба ваткаибх1ели,

Х1инц1ик1аргу шадли ятим хъяшара,

Гьанагарси г1ях1яй савгъат хибх1ели.
***

Дусла замунти кьяйда

Г1ямру дарсх1ейк1ес х1ейрар,

Аргъ кьяйда г1ях1ра вайра

Яргах1едик1ес х1ейрар.
***

Х1урхъира диркьурбира

Цагъунти диэс х1ейрар,

Бут1ацугдеш биахъес

Ванза диркьбарес х1ейрар.
***

Чиллара хъип1дешраван

Бебк1а-мекъ х1ешес х1ейрар.

Талих1ра кьиямара

Кьадарх1ейруси х1ейрар.

***

Гьунар жявли абурхар.

Сунечи сай вирхуси

К1ирка ц1акьличил узар.

Азадли ак1убсилис

Дунъя гьарзали бирар.

Арили уцибсилис

Ванза кьакьали бирар.
***

Сай игутала ургав

Усалсира ц1акьик1ар,

Сай х1ейгутала ургав

Ц1акьсира усалирар.
***

Урк1урби далгунтала

Талих1 даимси биар.

Шанта шан х1ерибсила

Дардани дахъал дирар.
***

Мар дигайли варгибси –

Ухъна х1елира – жагьил.

Дигай гьарх1едизурси –

Жагьх1елира вахъ ятим.
***

Урк1и иргъуси юлдаш –

Г1ямрула савгъатгъуна.

Урк1и агарси ашна –

Чебак1иб балагьгъуна.
***

Вег1ли вег1 х1ерируси -

Арцурси ч1акагъуна.

Урх1ла някъличи хъарси –

Бяхъибси жайрангъуна.
***

Хъалибарг дигахъуси

Дурав х1ериэс х1ейрар,

Кулпетла дард агарси

Хъулив х1еркайэс х1ейрар.
***

Дигай – аяз закгъунти,

Кьясдеш – къукъу-рямкьгъунти,

К1идех1елра - Дунъяла

Гьар г1ямзилар алк1ути.
***

Дигай агарти г1ямру –

Берубси хъит1агъуна.

Карц1или биц1иб урк1и –

Вавнабяхъиб анхъгъуна.
***

Урх1ла зяг1ипдешличив

Урк1и агар дукарк1ар.

Урк1ец1и-дигила вег1 –

Ил сагъварес гьуц1ик1ар.
***

Кьясдеш делг1усини –

Душмандеш дурчу.

Диги делг1усини –

Х1урмат ахъбурцу.
***

Къарцинни х1ербиубтас

Урх1ла кьац1 х1ебигахъу.

Чеббукули алк1утас –

Ил агар баз х1ейгахъу.
***

Ч1акачибра гьалакли

Т1ент1ра урцули бирар,

Амма т1ент1ла арцнили

Х1яйранируси х1ейрар.
***

Г1ях1си урк1ила вег1ли

Душмайсра г1ях1деш булга.

Кьясси хиялла вег1ли

Унрасра вайдеш булга.
***

Г1ях1си хабар дерхалли,

«Х1у – нушалари», - бик1ар.

Вайси хабар дерхалли,

«Х1у валх1елари», - бик1ар.
***

Мискиндеш чедуркъни –

Ил ц1ахдеш ах1ен.

Мискин х1ясибх1ерни –

Убях1деш саби.
***

Гашира изалара

Диг1янни дих1ес х1ейрар,

Дигайра гьими-кьясра

Гъапулли дуэс х1ейрар.
***

Жибин чат1а бетх1ерар,

Бец1 мукьара бетх1ерар,

Сецад дигули хьалли,

Жаллад юлдаш ветх1ерар.
***

Х1екьли х1ялалси адам

Ях1лизив ахъли вирар,

Х1ярамтала гьалавад

Бек1 ахъли вашес вирар.
***

ХУ. Дургъбира даршудешра
Дургъбазибад чарх1ебухъунтас
Ват1ан ц1ализибх1ели,

Ламилизир дерц1ибти,

Ах1ер ванза берцахъес

Г1ямру кьурбандарибти.

Дургъбазир детахъибти,

Ца икрамбаресалра

Х1ябразиб х1яб агарти.

Шантачи чарх1евхъунти,

Х1ушачи х1ерли гъамти

Бухънакабаахъибти?

Нурли шадх1едарибти,

Талих1ла унза абхьес

Кьадарбиъх1ебиубти?

Барх1и чех1ебаибти,

Чеак1уб наслубала

Х1урматла гъай х1ергъибти?

Х1уша гьанх1еркулрара?

Миц1ирли калунтиван

Гьанх1ершулрагу х1уша…

Дургъбази х1едякьунра.

Г1ямру кьяйда умира

Детахъибтив х1ушала?

Неш-ват1ан балтахъули,

Жан дедибти г1ях1гъубзни,

Хъумуртулирав х1уша

Гьаннала наслубани?

Наградабас михъирти –

Х1ушани гьадуцира,

Г1ейк1ули х1урх1бас гьунби…

Папрусличирад палда –

Дургъба дигуб х1ушала

Писдири палда чархла…

Гьар дус шабагъатличи -

Амма х1ерли х1ейрада

Жявли хъумуртниличи…

Г1ямрулизиб х1ушани –

Шагьидли дебк1ни сабри

Игъбар х1ушаб баибси…

Рухъна сар рахъх1и т1ашли.

«Къаркъала ургъанничи»

Цунси х1ер ат1и саби.

Х1яйранни пишрирхъули.

Дардани-шишимтала

Шях1румар г1янд ирзули.

Вякькадизурли сари.

Нур агарти х1улбазиб

Ургъанна сипат саби.

Сари чукуррарили.

Чарх1евхъунси уршили

Дунъя саб гьабарили.

Урк1майида неш къяйкли, -

Миц1ирли левх1еливан

Рургар урши чейули.

Биэс багьарбулхъули,

Цаибси гъинч1изнилис

Риэс пишра рирхъуси.

Рурги кьакьарик1ули,

Черрик1ибси рурахъес

Рурги алаврик1ули.

Бургар г1урра улкьули,

Урк1илизиб х1ябмузан

Сагали къизбулхъули.

Урк1майида неш къяйкли, -

Миц1ирли левх1еливан

Сарну урши чейули.

Сирх1яла дубуртазиб,

Лачинтала ват1айсиб

Х1ербирулри г1ях1гъубзни

Дила бишт1ал шилизиб.
Х1ебличил пишбирхъули,

Дуц1румличил х1улк1ули,

Гьар сагал барх1иличил

Сагал г1ямру лушули.

Чуни ункъли дяркъурти,

Кьяркьти къиян дусмазиб

Саби дебшлабиубти.

Шурмала х1ял багьурти,

Къаркъа к1ант1идак1ести

Зуг1луми чекасибти.

Пурс кьяцниван сак1убти,

Бухънах1елира жагьти

Г1ях1гъубзни - дила шанти.

Дях1лизи х1ербизурти,

Дец1аназибси Ват1ан

Чули азадбатурти.

Ардукьяллира дусми,

Иргъулра г1урра ц1умла

Дарсдик1алра манзилти:

Нешани алхунтала,

Узби х1ебак1ибтала

Майдайчибадли дергъла.

Иргъулра г1урра к1ухла,

Уршби къирбирутала,

Бикьулра сагал ц1умла.

Х1иличи г1урра гъаргъти?

Дила шанталагъунти

Ах1ену чула урк1би?

Кепкайубх1ели бара,

Хабар бурес вех1ихьиб

Гап-чях1ик1ули ухъна.

- Эгь, разила ах1енра

Жагьилтачи гьаннала:

Буч1ни ва бузни ах1и

Балули ах1ен селра.

Агь, вег1ебшла ухънадеш…

Жагьли виасри гьанна,

Дунъяла лерил улкни

Нуни чедидирхъира.

Къуймуртазирад жагал

Черрик1или леркира,

Улхъули, кеп-чеклизир

Шадли г1ямру дурк1ира.

- Жагьх1ели се барири? –

Рик1ар ухънази рухъна, -

Х1янчили къакъ балк1ахъи,

Узусиригу х1ура…

- Х1ябц1айс ну дигахъира.

Х1ябдарш наб бигахъира.

Рурсбала х1еранаув,

Г1яйиб, ухънакаира.

- Х1ябдарш бигути лебли,

Сен цалра сах1ерхири?

Х1у дигх1ейгуси набчи

Сен хъайчикайибсири?

- Х1ед вайбарес багьандан, -

Гьимурк1ули сай ухъна.

- Х1у вяркъес х1ериубра, -

Пишрирхъули сар рухъна.

Арцурх1ели, г1ярг1яра:

«Ну арцантала кьамла

Сабра» или хамбирар.

Илцад ц1ахси ах1енра,

Х1яка барсбираслира,

Ну к1ибях1ян ах1енра.

Далк1и чедаибх1ели,

Балга бариб дягали:

«Калахъаба бишт1али!»

Хъумуртан саби», - бик1ар.

Хъумх1ертурли буасли,

Дила кани гушбирар.

Х1у даим тясмабик1уд.

- Гьанна тясх1ебик1ули,

Бухънах1ели бик1ишав?

Делсун мукукрар кьяцни,

Гежба мяшт1ли х1ербизур:

- Ах1ек1убли бишт1аси,

Ак1асри ну халаси…
Мукьара
Бешкъубси ва амч1урси,

Балала ранг дуунси

Бухъна неш чебаили,

Х1яккабизур мукьара:

- Итцада ц1ахси нешла

Ишцада жагаси

Сен-сен ак1убра вара?
Ваца
Лебил наб бургъули саб:

«Анк1и дилг1улри» или.

- Цалилра пай х1ебиру,

Диг1х1едиг1и датасли.

Вац1ала хужаимра,

Дила дазу даталли,

Баришси сабра нура.

Агара дила вег1ра.

Набцад къарцин азаддеш

Бет1ибси жан лебара?

- Адамта х1ебалтулра.

- Балтари нуни кьяйда

Х1уни варъа бурчадли…

Анк1и дилкьух1ели, баркатла т1емра,

Гьайбатли чемъурси даршуси закра -

Ил саб дила давла, дила талих1ра.

Гьарилла дях1личиб шалал пишбяхъра,

Дигайли биц1ибси жагьтала х1ерра -

Ил саб дила давла, дила талих1ра.

Г1ях1си дев бурес лебли,

Уркъбякъ мабурид, адам,

Г1ях1си дев дарман сабну,

Инсайс, кьарлис маркаван.
Г1ях1деш барес вирули,

Вайдеш мабирид, адам,

Верх1кали чарбулхъанну

Г1ях1деш, бег1унси гьеван.

Лебгу гьанна бак1или,

Х1ялалли г1ямру дерк1ни

Инсайс г1ядаббилзуси…

Х1ехиб биэс х1ед давла.

Кьакьамайк1уд: х1ехибну

Ил хъямбирнила дардра.

Дец1лизибти ц1умбик1ар.

Цали цала х1ял аргъес

Гьамадли бирх1ебирар.

Гушси – кьясх1ейк1ес х1ейрар.

Цали ца г1еббуцалли,

Ургар къалмакъар х1ейрар.

Балк1си чебаэс халал

Къиян г1яг1ниси ах1ен.

Амма балк1си х1ебарес

Гьамадси-дек1ар ах1ен.
Урх1лис г1якьлуми дурес

Жапаси х1янчи ах1ен.

Хат1аби х1едирули,

Калес гьамадси ах1ен.

Лусенна бях1лизиб бак1ибси галга

Диркьала галгаван ахъбик1есара?

Вавнадяхъибх1ели, шахли дигубти

Кьялубани ц1едеш дахъал гесара?
Пикриагарсила кьяшма дяч1унти

Гулвавнани майдан жагьбаресара?

Шарабла мерличир зе делг1ух1ели,

Вава-кьарла х1ячми мурхьдик1есара?

Х1уни даим ч1иг1я дубша махидра».

Тамаша… Цулбазиб ч1иг1я саб г1урра,

Чуйна лайбак1асра, г1урра кайсулра.

Дарман х1у сабх1ели, назикси ч1иг1я,

Х1у г1яйибла бег1ван лайбик1ахъуси

Бархьси вара гьат1и халкьла бурала?

Дерцахъесгу илда жан цадех1елра,

Сагадарес рахли хьулани, къайгъни,

Билшуси х1улбук1ри чила-биалра…

Ак1нила чебях1деш ил х1ила к1ант1ли…

Яра… вишт1асила назикси ч1ярли

Жагьбиахъес дунъя пикрумазибси...

Миъли анк1ила хъу дуунси сурат

Дек1ли гъалабилзан х1улбала гьала

Адамли адамла къисмат булъалли,

Хъябхъяличиб кахси – ил ах1енара?
Духълуми дуц1румла ц1али игукъи,

Къирбала паргъатдеш наб г1ядаббилзан.

Унрали унрала урк1и х1ергъалли,

Дегъдешличиб дек1си – ил ах1енра?

Г1яг1нидеш лебх1ели, гьалмагъбикибти

Ил агарбиубх1ейс беткайхъур, марли.

Урк1ила дигили кьабулбарибти,

Г1ямру керисалра, кавлан х1ед марли.
Дурдибти сар, бик1ар, чедирти дугьби,

Чуйнара инсанта тикрардарибти.

Илцадра тяништи диалли илди,

Чинаб алк1утира, х1екьдеш х1ергъути?

- Дубурти, сен даим лех1кахъилрая?

- Жяг1яйчила инса пикрумазирра:

Адамла г1якьлули разидирурал,

Инса х1елукънили гардардирурал…
- Къакъбуни, сен илцад х1улдук1илрая?

- Дунъяличиб лех1деш к1айбизурх1ели,

Г1ямруличи умут мурхьбик1ух1ели,

Халкь-ургаб балгундеш ц1акьбик1ух1ели.

Х1еррик1улри карц1ли фестивальличи.

Цалабикибтала къуймурдешличи

Х1ясратх1ериэсра дила ц1акь аги.

Тяп шяг1ир кьяйда, ну карц1рарибх1ели,

Мякьлаб гъайбик1ути жагьтала гъайли.

Х1яйранриахъубра ну г1яжаибли:

Вег1 дигусиличив кугънаиркьусив? -

Чехиб хапли набчи хумарти дугьби

Авадан майдайчиб т1ама ц1ум-бархси.

Секьяйда х1еръасра, х1у гьимрурк1улри.

Х1ечи я гъамиэс, я гьарахъикес

Гьунар агарлира, г1янц1лирив, марли?

Х1ед г1ядаббизеси х1ебирис, вари.

Х1ечи х1ерилзесцун пурбанбарадли,

Талих1лизи буйг1ас, т1ашризи, гьари …

Жунабгъунти к1унт1би сар пишдирхъули:

- Царх1илтази дура илди хабурти, -

Дукарк1ули, рурси сари рубшули.

Ц1аличил х1язтали, вари, мариркьуд… -

Эс наб дигулригу, исбагьи регъуб.

Хъумкартурси тетрадь майдайчиб калун.

Белк1ани – лерилра назмурти сари.

Тетрадьла рег1 раргес къяйц1рулхъулира –

Сецад къяйц1рик1асра, ил х1ерургулра.

Дилара хъулирях1 рукьес кьас сабри,

Амма тетрадьла рег1 раргес умц1улра -

Машийчир аркьули, ил чериулра.

Ник1а делхъчибира хъярхъли арбукиб.

Хъумкартурли сунна тетрадьличила,

Тетрадьла рег1 рурси шинван к1унрац1иб.

Адрес ва у даргес ил сабяхъира.

Сецад умц1аслира, х1еррируси мер,

Илала у-бархли даргх1едаргира.

Тетрадьлизи г1урра х1еррилзулира.

Сих1ру-дархти дугьби жидик1утиван,

Тетрадьла бях1яни садирхъулира.

Набзи юлдашливан урк1и бурути.

Жагьдешла х1еблизир сари ак1убти,

Урк1и г1яжаибли х1яйранбирути.

--------------------------------------------------
Х1ед багъишладирулра
Дила г1ямрулизир карц1ли делк1унти

Цаибти белк1ани, дила ах1ерси,

Багъишладирулра х1ед уруз-х1яц1ли

Х1язличи шурмалтад дила х1ялани...

Ляркьира ну х1ечи, ахъили х1урхъи:

Ихъуливан къургъа гьарахъти улкни,

Атх1еб чузи дигай адац1ибх1ели…

Тяп ц1уэрван, кункли урцира х1ечи,

Хъип1дешлизирти жан тях1удирули,

Лавшардик1ахъули арши ва сагни.

Талих1ла нурана зубри диршаси,

Чиллала дуг1бани миъдярг1яхъибти

Мусни Берх1иливан миц1ирдираси.

Биршаси иш Ванза дила карц1или,

Кьясдеш-ламартдешлис урдубяхъяхъес

Дунъяличиб цалра мер ках1елесли.

Ну - х1ела шаддеш сарра,

Х1ечирад к1унриц1уси

Ну - х1ела пикри сарра.

Ну - х1ела игъбар сарра.

Х1уни рагьес х1ейруси

Ну - х1ела кьисмат сарра.

Х1ела кьиблама сарра.

Вашес вамсурси барх1и

Ну - х1ела хъарихъ сарра.

Гьаригу къяйц1майк1удра.

Занзби-урга михик1ван

Ну раргес къайгъибара.

Дигайла х1ерличил карц1ли х1еризни.

Дила хам урк1ира тамай батбухъун,

Гьаларагар къайгъни дак1ура духъун.

Г1ебшни кьибкья кьяйда гьарахъх1ерикни,

К1илалра х1улбазиб пишбяхъра ак1уб,

Умутла берх1ира шадли абухъун.

Х1уни къайгъи барри, г1ях1 бак1аб х1ечи!

Х1яялизир ахъли ну х1еррирахъес

Икьалавиубри, г1ях1 бак1аб х1ечи!

Насих1ят г1еббурри, г1ях1 бак1аб х1ечи!

Къияндикибх1ели, наб някъ гьабурцес

Г1елавит1х1ейк1удну, г1ях1 бак1аб х1ечи.

Анц1кьи черардикуси,

Берх1ила нурли кьяйда

Наб зак шалабируси,

Х1у - дила талих1 сайри
Х1ебли т1абиг1ят кьяйда

Ну сагарик1ахъуси,

Х1урхъла сагнани кьяйда

Даим карц1рирахъуси,

Х1у - дила талих1 сайри.

Урунжла вихли кьяйда

Агурби алк1ахъуси,

Урхьула гьигьли кьяйда

Аваданрирахъуси,

Х1у - дила талих1 сайри.

Мартла 23.
Дура, х1уни набзи малх1ямти дугьби
Дура, х1уни набзи малх1ямти дугьби,

Дец1лизибси урк1и паргъатбарести,

Челукьул шишимти к1ундац1ахъести

Дура х1уни набзи малх1ямти дугьби.

Дирихь чебарбякьи, зак аязх1ели.

Дура, гьигьрулхъасну атх1еб авлахъван

Жагьти гулвавнани вахбаршибх1ели.

Сай валхуси нешла дях1 дагьурх1ели.

Дура, карц1рирусну тяп г1улухъаван

Дигайли бег1 гьалав сай варгибх1ели.

Г1ямрула бархибдеш хъумартахъести,

Челябкьлала бурх1ни шаладарести

Дура, х1уни набзи малх1ямти дугьби!

Мартла 25.