1. Нешличила пикруми

Ну ляг1натра рик1улра.

Х1ечила гапбик1утас

Баркалла рик1улра…

Г1ях1цад къайгъи бирулра,

Дила урк1и иргъидал

Багьес х1ерирулира.

Анц1кьила ц1ум бишесли,

Нушазибад г1яламли

Даим г1ибрат кайсесли.

Дардани гъамх1ейэсли,

Мурил дигайла х1ерли

Гъамти х1ясратбаресли.

Цализир ца дегъесли,

Умути х1яланани

Х1ялал дунъя баршесли.

Ак1хъубри. Баркалла.

Г1ямруличи гъирара

Ахъбуцири. Баркалла.

Алк1ахъулри. Баркалла.

Шилизив къунзкайк1ули

Леврину, х1ед баркалла.

Буръуси нар забливан

Х1уни сагърарибх1ели,

Набчивра игъбарла вег1,

Гьанбирки, х1ейуб или.
Тяп нарла вавачиван

Х1яйрай х1ерилзух1ели,

Набчивра талих1чевси,

Гьанбирки, х1ергар или.

Дяц1ц1илар рих1ух1ели,

Набчивра гьарбизурси

Гьанарар, х1ейрар или.

Далайэс ахърира леб,

Урк1и иргъусиличил

Гъайрик1ес иштях1ра леб.

Дубагар дигира лер,

Дигилизир дилкьули,

Назик х1яланира лер.

Ванза ванабиахъес

Гъагултала ургабад

Берх1ила чури кьяйда

Ну х1ечи кариц1ира.
Дунъя шалабиахъес

Зубартала ургабад

Тяп бацла шала кьяйда

Ну х1ечи кариц1ира.

Х1у наб къаршиикибла,

Ванадешра шалара

Х1ечил бут1ес дигулра.

Г1яшикьван карц1ли вирен.

Г1ямруличи шяг1ирван

Дигиличил х1ерик1ен!

Гьавлизив ахъли вирен,

Булбулван жяг1яйчила

Даим далуйта уч1ен!

Гьимх1ерурк1ули дигив?

Лагьаван лякьирик1ен,

Челукьути зуг1луми

Набзира хъумуртахъен.

Дурх1я ветахъиб нешван.

Х1ечила пикрумани

Риц1ахъулра х1яливан.

Хьуланазив гъамх1ели?

Сен диг1яниркусири

Урк1илизив левх1ели?

Апрельла 20.
Дираллири абзани
Гъайла устнала ургар

Дираллири абзани,

Пасих1си г1якьлула вег1,

Цаибси х1у виради.

Дираллири абзани,

Бег1ла г1ях1 урк1ила вег1,

Гьавкьяси х1у виради.

Дираллири абзани,

Гьар жайчи карц1ила вег1,

Балас, чедииркади.

Сар гьачамлис абзани,

Исули багьалисра

Цацах1ели мерани.

Гьанна х1у гьарахъх1ели,

Лагьалагъунти х1ум-къум

Бек1лил иргъх1ергъух1ели,

Гьалакли г1ямрура лер.

Забх1ели варачанван

Дамкьурли дагьрира лер.

Пашбехъубли чархра леб,

Уббяхъибси галгаван

Буръули урк1ира леб.

Г1ях1си х1ебирни балас.

Дилкьути ташмишъули

Мардирарал х1ебалас…

Апрельла 26.

Чинаври

Чинаври, муртрил набчи

Ванали х1ерик1уси,

Г1ядатлис гъайадлира,

Дила урк1и улкуси?
Чинаври, цалра атх1еб

Цах1нар шалг1ерх1еибси,

Дила г1ямрула гьуни

Байбяхъили вебшибси?

Гьанбикуназив гъамси,

Ну-рег1си янашавад

Жявли гьарахъикибси?

Чекасес риубра – пашх1ерехъубра.

Х1ебла рурх1ул барх1и, жагаси ванза

Шявдиубли хапли, наб ц1ябдиалра.

Ламбик1уси урк1и ц1али игалра,

Х1ед ва риганайлис талих1 балгунра,

Дила кьимат буи, къала лушалра.

Се манзилра г1ялам гъаргъли биалра,

Дец1аницун хибси х1ед вайбаркь барес

Дила хамхализиб ц1акь х1ебаргира.

Ц1яб дуги бак1алли, шалал Бацличи

Г1яйибта биркьути леб биаллира,

Г1яйибх1ебирисра х1ечи сеналра.

Х1улук1илири х1ура.

Х1ечирра «талих1черли»

Шадли рулхъира нура.

Х1ергъири, ургуд, ц1умра.

Делхъли булхъуси чархла

Х1ясибх1ебарри дец1ра.

Чех1еири нургъбира,

Сабурла арилиуб

Г1яндбиркуси талих1ра.

Ц1ибхъбик1уси урк1ира,

Бахъ хамси урк1илизир

Харабти пикрумира.

Балусилра набчила,

Х1ергъибх1ели, итцада

Пикририк1ни х1ечила?

Дихьиб виадли х1уни,

Урх1личи духъун карц1и

Калаб х1ела амъурли.

Баргиб виадли х1уни,

Наб х1уван, вигахъули

Калаби риганайли.

Дила чарх бахъ х1яйранх1ели, х1улк1уси,

Х1у багьандан чедиулра г1язабти,

Х1у багьандан кьисмат буунра кьяркьли.

Х1у багьандан дигулра калес цайли,

Дила урк1и х1уни х1ергъни балукъи,

Х1у х1ейгахъес х1ерирулра, вирхаи.

Вававан пишрирхъира.

Х1у вашуси дякьличир

Зурх1ябти чедиира.

Чат1аван лех1ирхъира.

Х1ела янаша раэс

Пурсван гьалакрик1ира.

Урх1 шявли чебиира,

Шанта лерил дурути

Т1ент1лизи х1едирира.

Урк1ила х1ял далира.

Гьаман гьарахъиркадра,

Урк1илавли рашира.

Дуги-х1ери дурк1ира.

Сен гьанна дила урк1и

Х1ечи бярг1ибси вара?

Набчивад ласяхъядли.

Юх, ну аргъайчи кира

Кьисматла дек1си бяхъли.

Дигай дячунси барх1и.

Х1еррирус! Ц1умх1евхъахъес

Дилаван урх1ла урк1би.

Бурул гьар девличи ририра карц1ли,

Анц1ил тази кьяйда гьалакрик1ули,

Х1у левси мерличи риира дуц1ли.

Х1у варгес гьардаим ририра къяйц1ли.

Сукъурли хъабаван бячахъи урк1и,

Х1уни, бург1лумиван, ралтулрав пайтли?

Чумра дуги дила гьанк1 бемц1ахъурси,

Турливан бахъ мурхьли чарх бяхъяхъибси,

Х1ечидях1 тудяхъес дила кьасригу,

Дуг1ла жаниварван жагаилзулри.
Рурх1ути х1ялани ганзкадарибси,

Урх1ла лезмунази ну рикахъибси,

Х1ед вайдеш булгасра или кьасригу,

Ахъ х1урхъла къиргъуван къугъаилзулри.

Забли бирциб жярван х1у умулири.

Х1ерели к1ундиц1ул зубартасцада

Х1едра г1яйиббарес агара ахъри.

Ва дила уктем урк1и,

Вари кьакьамабик1уд,

Дугила гьанк1 бемц1урли,

Ц1ибхъбулхъадра гьарх1ели.
Г1ях1ра вайра дяркъурси

Дила назикси урк1и,

Вари, х1у ц1уммабик1уд,

Къургъали ват1ан кьяйда

Бархьбатадра талих1ли.
Хумармабируд, урк1и:

Дегъх1ели вава-кьарра

Чус дигули х1евкьарну,

Шахлиур вац1урбира

К1арала пях1х1ейрарну.
Зигармабик1уд, урк1и:

Г1ях1улали цалилра

Талих1 бархьх1ебалтану,

Гьалахили балалри,

Балагь чебарбикину.
К1ант1имабик1уд, урк1и,

Виралри, убк1усини

Ажалра т1ашиину,

Г1ямру талих1ра дец1ра

Дихули дузутину…
Июнна 7.
Дигахъирал хьарбаа
«Дигахъули калунрив?»

Сен хьарбиулри набзи?

Дигахъирал хьарбаа

Алав т1абиг1ятлизи.

Чиллала бурямлизи,

Х1ечибях1 х1ебургъахъес

Рулгирану сунези.

Кавдуси буркь бацлизи.

Х1ед шадли пишбирхъяхъес

Рулгирану сунези.

Ик1 бикьри – Берх1илизи.

Х1ед кьиблама бирахъес

Рулгирану сунези.

Их х1урхъла варачайзи.

Х1ела гьав ахъбурцахъес

Рулгирану сунези.

Х1ехара гьарбизлизи.

Х1ела унза ибхьахъес

Рулгирану сунези.

Сукъурси балагьлизи.

Х1ечи гъамх1ебирахъес

Рулгирану сунези.

Бац1иб дила чархлизи.

Х1ед талих1цун булгули,

Буркьбиуб урк1илизи.

Х1у чеэс х1ейгути х1еб ляркьян или?

Гьанбиркив, гьарил дев мяшт1бирул нуни

Х1ела гъай х1едакьес рирусра или?

Шах-сирисли хапли ц1ухбиру или?

Гьанбиркив, мурт-саррил пулук1диубти

Ванзала рангани ц1идулхъан или.

Чуйнара хамхали дардра г1яндбак1иб,

Х1у агарли хьалли, г1ямру т1ашх1елзни

Чуйнара урк1или набзи г1еббуриб.

Г1ямрула хъябхъяли х1улбира абхьиб.

Х1уни х1ергъахъадра, г1ямрула мяг1на

Дишунти карц1айли тамай аргъахъиб.

Июньна 11.

Дила дигайли
Дила дигайли ну ахъриахъубли,

Тяп зубари кьяйда, г1е, алкахъунра,

Удир ванзаличир дуру-дирути

Тяп зубариливан чера диулра.

Г1ядатласи виъни, вег1ебш, багьурра.

Ш1яг1ир мех1урлизи халируси х1у -

Сецадла г1яшлирил, аргъра аргъира.

Диуб-дарибтачи х1еркарик1улра.

Кьисматла дукьбани гьарахъдарили,

Цугх1едикниличи шукру рик1улра.

Цали ца чеибкъи, «дагьх1едагьурра».

Нушала урк1базиб бурям бургъукъи,

Дубалра х1ехъили, шалг1ердухъунра.

Дубахъили гъайэс ц1акь х1ебургулра.

Х1ябц дирихьли дила урк1и буцалра,

Х1ед закла аяздеш нуни булгулра.

Рираси хьулрик1ули

Ну х1ела карц1иличи,

Анц1кьи хъумуртахъути

Диги-дархти гъайличи.
Рираси хьулрик1ули

Х1ела ванал х1ерличи,

Хамха кункбирахъути,

Дигайла мурхьдешличи.

Умутра г1яндбушира.

Х1ечила хъумартурла…

Паргъатли х1еррирулра.

Урх1 усалтиван билзи,

Ца х1ела никализи,

Марли, цалра х1ебулхъи.

Миъ биц1усиван билзи,

Чиллала буг1ярдешра

Х1ебла гьигьван ламбулхъи.

Ванза чугурван буч1и.

Ца нуницун иргъути

Агурбира зайдулхъи.

Шин черт1ибх1ели кьяйда.

Вералира ц1ухлира

Гавбик1ул ужагъ кьяйда.

Ит ц1ала ванадешра,

Ц1ябдеш гьарахъдируси

Ц1илц1илагла шалара…

Урк1и батбухъесли, далайэс диги,

Сирх1яла сагникад къунзрик1ес диги,

Хамли дерк1иб дусми гьандиркахъули,

Х1урхъала х1ерлиуб гьигьбатес диги.
Урунжла вихлизир дугьби дурчули,

Х1ечила х1ябкубти г1яйдарес диги,

Дунъякад вашули, шишимх1ейк1ули,

Х1у левниличила наб аргъес диги.

Ахъливан рисириэс,

Тяп дурх1ях1ели кьяйда

Нургъбачил анц1кьи дирцес…

Дигарцада х1яйратес,

Челукьутала дек1 мах

Лайбак1или гьигьбатес…

Мурил гьанк1ли русаэс,

Тяп г1улухъах1ели кьяйда

Талих1черли х1ерриэс…

Челябкьлаличи рирхес,

Г1ямрула т1имир-химир

Пикрилизи ках1ейсес.

Рагьурли дигух1и, х1ерагьуррану.

Г1ямрули релкахъи, аргъайчи кибси

Тяниш къаралдицун чебиидрану.

Х1ябкьяйличиб т1ашси ядагъунара,

Дуг1бани бирхъуси, хъябхъяуб т1ашси,

Г1ямрула бяхъяна х1янбарбарибси.

Дуц1румра янира ранг дарсх1ейруси,

Бухънабаибх1елра къух1х1ебилзуси,

Чиллалис, дегъдешлис мут1иг1х1якьуси.

Гьалабван ванали салам гаслира,

Х1ехара карц1айли бигубси урк1и

Гъузгъалдибиахъес бахъ х1ейгулрану.

Хъабалар, шиннизир сари дих1ялра,

Ну кьяйда янашар дилкьул вавнала

Г1ямру даимдирни, аргъа гьанналра.

Г1яйибти дургух1ели,

Ца г1ях1тицун шалуби

Нуни х1езир дургира.

Г1ялам хъяма биркьаллра,

Алжанала жайранван

Х1у вахъ жагаиилзира.

Х1у нуни чейух1ели,

Ламартдешла асарли

Наб ранг дарсдарибара?

Наб якьинбиух1ели,

Г1ямру лертиван чейэс

Бурсириублирара?

Июльла 1.

Сагали даргиб дигай
Атх1еблизиб ванзаван

Карц1ли чевиргъух1ели,

Дилаван ц1уммабухъаб,

Х1ела бахъ г1янц1си урк1и.

Пишряхъес дигух1ели,

Дилаван амъур карц1ай

Мадяхъяб х1ела шахли!

Шадли х1улрук1ибх1ели,

Гьайбатси чарх дилаван

Мадуаб х1ела миъли!

Талих1личи х1ерх1ели,

Къукъу-рямкьли дилаван

Мадигахъаб хьулани!

Хумар х1улбала х1ер чех1ебиэсли,

Гьарахъли х1еррирни игъбар саб вара?

Набчивад дураша дуг1верхурси х1у

Даимлис хъумартни талих1 саб вара?
Жагьдешла хьулани х1яридихьили,

Азадли х1еррирни гьунар саб вара?

Дила гьар гьигьлизив х1у левли хьалли,

Цах1нар х1ерх1едирни кьисмат саб вара?

Сецад мурхьти диалра,

Манзилла г1еркъадешли

Х1яндурцахъу лерилра.

Сецад игу диалра,

Дяхънуша-заманали

Сагъдирахъу илдира.

Х1ялал дигай чилалра,

Иличиб дек1си дяхъи

Х1ебирар чинабалра.

Лук1ен, - бик1аргу набзи.

Гулвавнала х1ергъунти,

Хъяшала пишбяхъгъунти

Дила дигайла тугъи.

Лук1ен, - бик1аргу набзи.

Аръа забла к1ант1гъунти,

Нешла х1ялал ниъгъунти,

Дила карц1айла тугъи.

Лук1ен, - бик1аргу набзи.

Арцур зубаригъунти,

Билшуси зурх1ябгъунти

Дила игъбарла бурх1ни?

Лук1ен, - бик1аргу набзи.

Мерсли буун шигъунти,

Ц1али бигуб хъугъунти

Дила талих1ла дусми?

Лук1ас г1ямруличила,

Хъябхъяра шах-сирисра

Анхъливан чекайсути,

Атх1еб сагадик1ути

Кьяркьси янилис г1ергъи

Ванзаван ц1идик1ути…

Хъинжличиб гегугван ну руч1ух1ели?

Гьаваличиб бурги, г1яярбашули.

Х1ерейс т1умалаван дагьри дусаи?

Дила х1улбас гьала пардав баршилри…

Вец1ну к1ира саби базла ишбарх1и.

Г1ергъити белк1ани, сар ишбарх1ила,

Гьалак ихтилатван хъярхъли делк1унти…

Танбих1 барибсиван, урузриубли.

Алав чилра агу ца ну ах1енси,

Тетрадь беткахъили, ил баргес къяйц1си…

Х1ед г1ядаббизеси х1ебирис, вари.

Х1ечи х1ерилзесцун пурбанбарадли,

Талих1лизи буйг1ас, т1ашризи, гьари …»

«Гьаналра агарси», сунечи х1ерси…

Секьяйда х1еръасра, х1у гьимрурк1улри.

Х1ечи я гъамиэс, я гьарахъикес

Гьунар агарлира, г1янц1лирив, марли?»

- «Царх1илтази дура илди хабурти»,

Х1ерирус, рурси, х1ед насих1ят бурес -

Х1унил арзес рируд урк1иличирти.

Манзилли гьанбуршу ил, х1яналиван.

Духуси рургуд х1у, жагьси далайчи,

Урк1и бурутачи ташмишрик1уси.

Насих1ят г1еббурес ралризниличир…

Г1яшкавцибти х1улби сар гьандиркули,

Жунабгъунти к1унт1би сар гьанарули,

Х1ела урк1иларти гьанна иргъули,

Сарра нура лех1ли, шип1ванрярг1или…

Урх1ла тетрадьли ну гъузгъалдирарра.

Чинабях1 бурхьусил, балх1ебалули,

Нуни ил буч1антас гьалабирхьулра.

Цундеш яра ц1уръадеш,

Г1ердиахъуну чуни

Пякьиртас биябурдеш.

Чус г1якьлула саркъибдеш!

Адамла чевях1дешла

Иргъуну чуни х1екьдеш.

Излуми, я мискиндеш,

Лут1и кьут1ли бужуну,

Чуни игъбарагардеш.

Чусра дигайла мурхьдеш

Амъур карц1айла гьигьли

Бихуну гьарлис шаддеш.

Шишимтала кьут1кьудеш,

Гъудурбируну чуни

Г1ямрулизи бархибдеш.

Гьарбизла х1улбук1ибдеш,

Гьарзабируну шадта

Манзилла авадандеш.

Бургъантасра разидеш,

Ват1ан сахъли бих1яхъес

Калаб чула арадеш!

Жагь г1ямру къябдердибти,

Жагьти хъабирух1ели,

Х1ябри кьадардиубти.

Карц1айли х1еделкъунти,

Бишт1ати кабалтули,

Кьукьуби х1еделкунти.

Х1яндиэс х1ебикибти,

Жагьтала къушум-ургар

Шинна к1ант1ван дегъубти.

Кьац1ла пай аберхурти,

Бахъ бигути гъамтала

Бук1ри х1яндиахъубти.

Шалал дунъя батурти,

Ц1елдубазирад гьуйчи

Х1яйранни х1ердик1ути.

Нурли ц1удара х1ябри,

Х1ушачилацун ах1и

Ц1уммабухъаб г1ур гъамти!

Ц1абилкь биршулри х1уни.

Г1ядатласи, чебях1си

Ихъулри х1янчилизи.

Гьандиркахъулри дусми,

Разити ва пашманти

Садирхъулири бурх1ни.

Ванадарири х1уни?

Ламила шалаливан

Чумла дях1 шаладарри?

Г1ядаб беркунри х1уни?

Бура, чуйна дубурти

Далуйта делх1ехъунри?

Ц1абилкь бухънабаибси,

Дургъби гьандиркахъуси

Саб бикьри лех1кахъибси…

Х1ейгуси, марли, х1ергар.

Г1ямруван дигахъудгу

Наб х1ура, дила Ват1ан.

Дигахъис наб дях1ила

Шала-хьанц1а дях1ц1ира,

Берх1илиур рурх1ути

Някьишунар пуслира.

Х1ела караматдешра,

Урк1и шадбирахъуси

Хамси авадандешра.