Тема 7. Багьираби – рух1ла давла сари

VI. Текстлизир къаршидиркути сагати дугьби баяндирни ва тетрадунази лук1ни.
Пях1ли буаб – беткахъаб.

Дубси – х1унт1ен-бухъут1а журала мегь (медь)
VII. Дарсла темаличила ихтилат дураберк1ни. Суалти ва х1янчурби.

1. 
   «Пях1ли буаб иш дунъя» или поэт сен вик1уси?
   
2. 
   Ишбарх1ила г1ямрулизир назмулизир гьандушибти баянти къаршидиркулив?
   
3. 
   «Кепеклизи агарси» дунъя гьанна сецадла барсбиубли?
   

VIII. Дарсла тема аргъилил ахтардибарни. Тема кагахъни.
Ишбарх1и нушани аргъира:
Даргала далайси Мунги Г1ях1мад 1863 ибил дуслизив Г1ярбук1ла шилизив мургьи-арцла устала хъалибарглизив ак1убси виъни.

Вишт1али вирух1елил, ил 5 дус виубх1ели, илала неш ребк1ни. Илала дудеш царх1ил хьунуйчи хъайчикайибмад, Г1ях1мадлис кьут1кьути г1ямру дех1дихьни. Кьац1ли велкъес имканагарси ц1уръа урши далуйти цаладирхъес вех1ихьни.

Халаваибх1ели, ил гьарли-марси мургьи-арцла уста ветаъни ва халкьла урк1базив далайла машгьурси уста сайливан кални.

Сунела далуйтазиб Мунги Г1ях1мадли мургьи-арцла устнала г1ямру сипатдарни ва бархьдеш агарси дунъя бат1ни.

IХ. Дурх1нала бажарди, пикрибак1ни кьиматлабарни.
Х. Хъули х1янчи бедни. 1. М. Г1ях1мадла биография бяркъес ва «Пях1ли буаб иш дунъя» бик1уси назму урк1иличиб багьес. Г1ярбук1ла шила яра мургьи-арцла устала ваях1ла суратуни дарес.
II – ибил четверть

10. Тема: «Кочхюрлан Сяг1ид».
Дарсла мурадуни: Мунги Г1ях1мадла творчество тикрарбарни. «Кочхюрлан Сяг1ид» бик1уси тема аргъахъни.

Дурх1нас бяркъ бедлугнила мурад: дарган мезличи, Кочхюрлан Сяг1идла творчестволичи дурх1нала диги адилкьни.

Дарсла г1яг1ниахълуми: Дагъиста халкьла гьаларла г1ямру сипатдирути суратуни, Кочхюрлан Сяг1идла назмурти.
Дарсла башри:
I. Дурх1ни дарсличи х1ядурбирни.
II. Хъули х1янчи ахтардибирни. Х1ергъибти суалти баяндирни.
Мунги Г1ях1мадла биография ва творчество тикрарбарни. «Пях1ли буаб иш дунъя» бик1уси назму урк1иличиб бурни. Г1ярбук1ла шила ва мургьи-арцла устала ваях1ла суратуни х1ердарни.
III. Сагаси тема аргъахъни.
Кочхюрлан Сяг1ид – лезгибала машгьурси ашуг – поэт сай. Ил ак1убси сай Кюрила ханстволизибси (Гьанна Курахла районнизибси) Кочхюр бик1уси шилизив. Ил уч1ахъес мадрасализи вархьибсири, амма илис ил таманбарес имканх1ебак1иб: бег1ти бебк1или, ил ц1уръавиуб. Беркеси кьац1 баргес багьандан ил Азербайджайзи ваиб. Илабти ашугуначил тянишиуб.

Хъули чарухъунх1ели, Сяг1идли ханани, давлачебти пужбири, илдани мискинтачи дирути гуж-зулмурти чедиахъи.

Илала далуйти г1ях1х1едизур Кюрила вег1бек1 Сурхай ханнис. Кочхюрлан Сяг1идли сунела назмуртазир Сурхай ханна зулмукардеш ва х1иллакардеш чедаахъиб. Илбагьандан ханни буйрукъбарили, сунечи ашуг кахъибсири ва илала х1улби адит1унтири.

Сяг1ид ханнис мут1иг1х1ек1иб ва «Мурсалханничи ляг1нат» бик1уси назму цалабяхъиб. Ил образ ца Сурхай ханнацун ах1ен. Лебилра итх1елила хананала образ сабри илбагьандан назмулис ашугли «Мурсалханничи ляг1нат» бик1уси у бедили сай.

IV. Назму саркъахъили буч1ни.
V. Х1ергъути дугьби бяандарни ва тетрадунази лук1ни.
Ашуг – далайчи, поэт.

Булбул – чат1нала журала арцан, сабира востокла халкьанала далуйтазиб даим гьанбуршуси.

Саз – лезгибала макьамти дирхъуси г1яг1ниахъала.
VI. Сагаси дарс аргъилил ахтардибарни.

1. 
   Ашугли Мурсалхан сегъунали чейахъули?
   
2. 
   Илини дирути гуж-зулму секьяйда чедаахъили?
   
3. 
   Сегъунти гуж-зулму чекайули давлачебтани мискинтачи? (Илдачила бурути тугъи даргая ва сагадан делч1еная).
   

VII. Дарсла итогуни каъни. Дурх1нала бажарди ва багьудлуми кьиматладирни. Илди сагати багьудлуми касахъес гьирбирни.
Ишбарх1и нушани аргъира.
Кочхюрлан Сяг1ид – лезгибала машгьурси ашуг – поэт виъни. Ил Кюрила ханстволизибси (Гьанна Курахла районнизибси) Кочхюр бик1уси шилизив ак1убси виъни. Бег1ти бебк1или, ил жявли ц1уръавиъни. Беркеси кьац1 баргес багьандан ил Азербайджайзи укьни. Ишабти ашугуначил Сяг1ид тянишиъни.

Хъули чарухъунх1ели Сяг1идли сунела назмуртазир Сурхай ханна зулмукардеш ва х1иллакардеш чедаахъни. Илбагьандан ханни буйрукъбарили, илала х1улби адит1ни.

Сяг1ид ханнис мут1иг1х1ек1ни ва «Мурсалханничи ляг1нат» бик1уси назму цалабяхъни. Ил образ ца Сурхай ханнацун ах1и, лебилра итх1елила хананала образ биъни ва илбагьандан назмулис ашугли «Мурсалханничи ляг1нат» бик1уси у бедни.
VIII. Хъули х1янчи бедни. Кочхюрлан Сяг1идла биография бяркъес, ашугла «Мурсалханничи ляг1нат» бик1уси назму саркъахъили белч1ес ва назмулис г1ергъи гибти суалтас жавабти х1ядурдарес. «Далайа, далайчи» бик1уси назмура белч1ес.
11. Тема «С. Г1ябдуллаев. Дуц1рум»
Дарсла мурад: Сайгид Г1ябдуллаевла биография ва творчество руркъни ва «Дуц1рум» бик1уси назму саркъахъили буч1ни ва назмулис г1ергъи гибти суалтас жавабти лугни.

Дурх1нас бяркъ бедлугнила мурад: Сайгид Г1ябдуллаевли делк1унти жузачи дурх1нала диги адилкьни.

Дарсла г1яг1ниахълуми: Сайгид Г1ябдуллаевла сурат ва илини делк1унти жузи, словарьти.
Дарсла башри:
I. Дурх1ни дарсличи х1ядурбирни.

2. 
   Хъули х1янчи ахтардибирни.
   

Кочхюрлан Сяг1идла биография чеббурни. Ашугла «Мурсалханничи ляг1нат» бик1уси назмула бек1 мягна белгибарни. саркъахъили «Далайа, далайчи» бик1уси назму буч1ни.

III. Сагаси тема аргъахъни.
Сайгид Г1ябдуллаев машгьурси г1ялим ва педагог вирусири, пагьмукар писательра сайри. Сайгид Г1ябдуллаев ак1убси сай 1903 дуслизив Даргала округла Мух1ела шилизив, кьадила хъалибарглизив. Дудешли хъайг1ив уч1ахъули, пагьмукар Сайгидли вишт1ах1елил халаси багьуди касибсири, илини чекайзурли дяркьур г1ярабла мез ва поэзия.

20 ибти дусмазив, учительтала курсанира делч1и, Сайгид Дагъиста Академияла филиаллизибси историяла, мезла ва литература институтлизи г1илмула х1янчизарли катурсири, илав узра узусири, пединститутлизив даргала мезла ва литерала преподавательла х1янчира бузахъусири.

Илх1ели ил дебали сабухъчевли узусири назмурти ва хабурти лук1нилизивра. Илини делк1унти хабурти ва назмурти даргала школабазир дурх1нани дигиличил дуч1ули сари. Дурх1нас дебали г1ях1дизурти произведениеби сари Сайгидла «Канилис дарман», «Мусахъай» бик1ути хабурти.

С. Г1ябдуллаевли даргантас цаибти литературала ва мезла учебникуни дуракаиб. «Урус мезла ва дарган мезла словарь», «Дарган мезла орфографияла словарь» дуракаиб. Илини ват1айчи дигили диц1ибти дахъал назмуртира делк1ун.

IV. Сайгид Г1ябдуллаевла биографияличила ва творчестволичила къант1ти баянти тетрадунази лук1ни. (1903 – 1952)
V. «Дуц1рум» бик1уси назму саркъахъили буч1ни.
VI. Х1ергъути дугьби бяандарни ва тетрадунази лук1ни.
Дегъли – заб х1едарили, ванза берубли.

Х1унзи – кьац1дашути миц1иркьянти (Слепни. Илдала сурат чебаахъесра вирар).

Гяргярбик1ули – дебали буц1арбик1ули.

Ц1ярц1ярбик1ули – х1улби изесли, лямц1бик1ули, шалабик1ули.

Къярд – къадаван мурхьси, гьарзаси мер.

Ик1ат1иб – ик1 мерличиб.

Мура далкьули – мура удиррчедирули, дурахъули.
VII. Сагаси дарс аргъилил ахтардибарни.

1. 
   Дуц1румла сурат се тях1ярли сипатбирули назмулизиб?
   
2. 
   Дурх1ни сен разили дуц1румличи?
   
3. 
   Сегъунти х1янчи дирули хъубзурани дуц1румлизир? (Илдачила бурути тугъи даргая ва сагадан делч1еная).
   

VIII. Х1улк1уси манзил. Дурх1нази бамсриихъахъни.

Чакар
Варъали рукул Чакар

Ибан т1уйчил гьак1рик1ар,

Узизи буйрухърик1ар:
– Неш рик1ар: «Г1ях1мад, – рик1ар, –

Х1у шичи укьен, – рик1ар, –

Хъалира бушка, – рик1ар.
– Г1ур, – рик1ар, – даим, – рик1ар, –

Умули вашен, – рик1ар, –

Дурсрира делч1ен, – рик1ар.
– Г1ур, – рик1ар, – дагван, – рик1ар, –

Къяна мабурид, – рик1ар, –

Къавгъа мадирид, – рик1ар.

– Х1у, – рик1ар, – г1ях1си, – рик1ар, –

Урши ветаи, – рик1ар, –

Илх1ели дигарцада

Варъара лугас», – рик1ар.
IХ. Назмулизир тикрардик1ути дугьби дургни. Вег1ла гъайлизир илкьяйда дугьби тикрардирес асух1ебирниличила дурх1нази аргъахъни.
VII. Дарсла итогуни каъни.
Ишбарх1и нушани аргъира:
Сайгид Г1ябдуллаев машгьурси г1ялим, педагог, пагьмукар поэт ва писатель виъни. Сайг1ид Г1ябдуллаев 1903 дуслизив Даргала округла Мух1ела шилизив, кьадила хъалибарглизив ак1убси виъни.

20 ибти дусмазив, учительтала курсанира делч1и, Сайгид Академия Дагъиста филиаллизибси историяла, мезла ва литература институтлизи г1илмула х1янчизарли узни. Ил дебали сабухъчевли назмурти ва хабурти лук1нилизивра узни. Илини делк1унти хабурти ва назмурти даргала школабазир дурх1нани дигиличил дуч1ули диъни.

С. Г1ябдуллаевли даргантас цаибти литературала ва мезла учебникуни дуракаъни. «Урус мезла ва дарган мезла словарь», «Дарган мезла орфографияла словарь» дуракаиъни. Илини ват1айчи дигили диц1ибти дахъал назмуртира делк1ни.
VIII. Дурх1нала бажарди ва багьудлуми кьиматладирни.
Хъули х1янчи бедни. Сайгид Г1ябдуллаевла биография багьес, «Дуц1рум» бик1уси назму саркъахъили белч1ес ва назмула 4 тахта урк1иличир дагьес.

12. Тема З. Зулпукьаров «Бурямлизиб»
Дарсла мурад: З. Зулпукьаровла биография руркъни ва «Бурямлизиб» бик1уси хабар саркъахъили буч1ни ва нлис г1ергъи гибти суалтас жавабти лугни.

Дурх1нас бяркъ бедлугнила мурад: даргала литератураличи дурх1нала диги адилкьни.

Дарсла г1яг1ниахълуми: Зулпукьар Зулпукьаровла сурат ва илини делк1унти жузи, «Гьалмагъдеш» бик1уси журнал.
Дарсла башри:
I. Дурх1ни дарсличи х1ядурбирни.
II. Хъули х1янчи ахтардибирни.
Сайгид Г1ябдуллаевла биография чеббурни. «Дуц1рум» бик1уси назму саркъахъили буч1ни ва назмула 4 тахта урк1иличир дуч1ни, назмулис г1ергъи гибти суалтас жавабти лугни.
III. Сагаси тема аргъахъни.
Даргала машгьурси писатель З. Зулпукьаров ак1убси сай Мях1ячкъала шпгьарлизив къуллукъла адамла хъалибарглизив. Илини «Дубуртазиб савлила шала» бик1уси жуз белк1унсири, сабира дарган, лезгин, азербайджан ва урус мезаначил дурабухъунсири. Илис г1ергъи дарган мезличил дурабулхъуси «Гьалмагъдеш» бик1уси журналлизир «Сунела хъалибарглизиб», «Дубурлантала ламус» бик1ути повестуни ва хабурти дурадухъун. Илини делк1унтири «Арзибси г1янд», «Гьалмагъунала урк1би» пьесабира.

З. Зулпукьаров чумал дус спортла, «Труд» обществола тренерли узули калунсири. Сунес дебали спортра спортли биркьути адамтира дигух1ели, илини Дунъяла чемпионти Сали-Сулайбайчила ва Г1яли Г1ялиевличила повестуни делк1ун.

Ишбарх1и нушани буч1ех1е З. Зулпукьаровли белк1унси «Бурямлизиб» бик1уси хабар.

IV. З. Зулпукьаровла биографияличила ва творчестволичила къант1ти баянти тетрадунази лук1ни. (1927)
V. «Бурямлизиб» бик1уси хабар саркъахъили буч1ни.
VI. Х1ергъути дугьби бяандарни ва тетрадунази лук1ни.
Хужаим – вег1 бек1.

Зоотехник – миц1ирагличи х1еруди бузахъуси, илди арадирахъуси адам.

Дурзам – мазала х1енкь.

Варгьи – бук1унани забх1ели яра буг1ярх1ели чеди челгьуси палтар (Бурка).

Къардрухъи – тякрухъи, х1усрухъи.
VI. Сагаси дарс аргъилил ахтардибарни. Суалти ва х1янчурби.

1. 
   Сегъуна сайри Аминатла хала дудеш?
   
2. 
   Хала дудешличи Аминат сен рак1ибсири?
   
3. 
   Хала дудешли Аминатличи сен дурзам хъарбарибсири?
   
4. 
   Секьяйда бурямлизибад дурзам берцахъиба рурсили?
   
5. 
   Аминат сегъуна хасиятла рурси саррил, хабар бурая.
   

VII. Дарсла итогуни каъни.
Ишбарх1и нушани аргъира:
Даргала машгьурси писатель Зулпукьар Зулпукьаров Мях1ячкъала шпгьарлизив къуллукъла адамла хъалибарглизив ак1убси виъни. Илини «Дубуртазиб савлила шала», «Сунела хъалибарглизиб», «Дубурлантала ламус» бик1ути повестуни ва хабурти, «Арзибси г1янд», «Гьалмагъунала урк1би» бик1ути пьесабира делк1ни.

З. Зулпукьаровлис дебали спортра спортли биркьути адамтира дигух1ели, Дунъяла чемпионти Сали-Сулайбайчила ва Г1яли Г1ялиевличила повестуни делк1ни.

З. Зулпукьаровла «Бурямлизиб» бик1уси хабарлизирси рурси Аминат дебали духуси, сунечи хъарбикибси х1янчи бажардиличил таманиуси рурси риъни. Илала хала дудеш урехи агарси адам, бук1уннна саниг1ят халати дигиличил бузахъуси адам виъни. Ил Аминатличила мурталра пикриик1ули виъни.

VIII. Дурх1нала бажарди ва багьудлуми кьиматладирни.
IХ. Хъули х1янчи бедни. З. Зулпукьаровла биография багьес ва «Бурямлизиб» бик1уси хабар чеббурес. Суратик1ес балусини мукьара някъбази буцибси Аминатла сурат барес.
13. Тема ва бек1 мяг1на

Дарсла мурад: «Произведениела тема ва бек1 мяг1на руркъни.

Дурх1нас бяркъ бедлугнила мурад: даргала литератураличи дурх1нала диги адилкьни.

Дарсла г1яг1ниахълуми: мукьара някъбази буцибси Аминатла дурх1нани дарибти суратунала выставка.
Дарсла башри:
I. Дурх1ни дарсличи х1ядурбирни.

2. 
   Хъули х1янчи ахтардибирни.
   

З. Зулпукьаровла биография ва «Бурямлизиб» бик1уси хабар чеббурни. Суратбик1ес балутани дарибти мукьара някъбази буцибси Аминатла суратуни х1ердарни.

III. Сагаси тема аргъахъни.
Гьарилра лирературала произведениела тема ва бек1 мяг1на лерти сари. Писательли сунела произведениелизиб селичила бурулил, сегъуна масъала гьала т1ашбалтулил – илис тема или бик1ар.

Хабар, повесть яра царх1ил произведение белк1ес гьалав писатель пикриулхъули вирар, сунени произведениелизир чедаахъес дигути, сунени г1ямрулизир чедаибти яра чех1еруди бузахъули х1исаблизи касибти анц1букьуначила.

Х1якьикьатлизир кадиркути дебали мяг1ничерти яра дибг1ян-хъяшти, адамтас пайдалати яра зараллати г1ях1ти яра вайти, урла яра ишх1елла, урк1ец1ила яра зулмула баркьудлуми ва г1ямрула царх1илти шалуби пикридарили сунела произведениеби цаладирхъу. Сунела г1ямрулизир чедаибти лерилра анц1букьуназирад произведениелизир диэсти, х1якьикьатлашал х1екьти масъулти чедаахъес ва илдачила сунела пикри бурес кьасбирули вирар.

Масала. З. Зулпукьаровла «Бурямлизиб» бик1уси хабарлизиб хала дудешли Аминатличи дурзам хъарбариб. Урехиагарси рурси Аминатли бурямлизибад дурзам берцахъиб. Илала хала дудешра урехиагарси, бук1уннна саниг1ят халати дигиличил бузахъуси адам Аминатличила мурталра пикриик1ули сай. Хабарлизир лер хури, маза, бишт1аси мукьара, адамтала бузери.

Произведениела

Изтегляне 0.96 Mb.

Сподели с приятели: